James 2

To Kni Aza Awyem

1Omi aza ye-yeyi fye ɓa gna n wuna nu ge fye zhin Dagayi Yesu Kristi nya nu, Dagayi latu nya, fye gna ye n na anyabwayi nu fyei zhin awyekwoyi nukwoyia?

2N oza loɓe efye aduwa nyakun, n na aje nakwoyi kpe, n zinariya abwanyayifi, njesun ozado wa loɓe n wo naje sakunyi kpe. 3Fya gnaye n nyabwayi nu, fya ga wo aseseba manayi fya gna wyekwoyi ge, “La gni n bwai kwo ha sase.”

4To, fye ye n zayi n tu n wo nyabwa ɓo kwa wanu ge fye kni aza kni-kni le nu.

5Fye wo, emi azaje, Shekwoyi nla awyekwoyi kni ɓa ze anyabwayi dna n gaiciya ga, Eshebemi zhin ɓa nya nu, gama cauta nu n Shekwoyi zhin aza alkawali nɓa ye Wo. 6Ama dna n na aza ngun abahi fye la wyekwoyi ci wyegba, fyei dnawo vinyikwo. Fye ta palo ge anyabwayi nu lo n fyei n na awada ban, ai gyi fye tara ai gu fye fi n wyegma nyakun. 7Nsai mwa begye oɓanu ma Yesu Kristi esan. Oza n na yi fye n woye manayi nyi.

8E, ɓehin-hin, kwo bmiya fya shi Dagayi wyidna bwa, “Tilas ha ye nho kunzhinyi ha bmawo zhin shi ho ye hohin tukwo.”

9Ama fye ta shi Dagayi owa ye bwa lon, nfya gnaye n na anyabwayi fya laɓatu, kwo zhin ɓenukwoyi nu.

10Oza n wa shi awyidna bwa vinya wa fa gmanyi wo n iaifiyi lo ngye oza nwo to shiɓa bwan vinya. 11Gama Shekwoyi n wa ci ge hota la nyikwo n wo eɓayilon, wo na ci ge hota wu zan, ntucenu kwo ho to zun mula owa gnanan ha zhin anagbayin, ama ho la oza wu, ho la Shekwoyi owa zungna-na vinya, hola ze owa gnazunyi, laifida nu nwa bye.

12Aɓei da fye owa, kwo fya zhin kwo to fya zhin oɓo n Kristi yen. Ntucenu fye zhin peceye n nyayi n Ifye zhin n nyayi n fye da. 13Gama ato ɓei gye aza sun-sun n ɓa to gye aza sun-sun. Ama nha gye oza sun-sun Shekwoyi ɓei gye ho sun-sun esa n wo ɓei da ho wa cei.

Gaiciyaga Nna Tnu-tnu-yi

14Emi azaje ye-yeyi, mi gye kwo apma, nfye cige fye n gaiciya gailo, fyei zhin a Yesu-viyi nu, ama to fyei bma azaje zhin. Gaiciya-ga yi pya ɓa gni oza? 15Ndei ho nugundo yilo n wo to n nyagyi yi lo na jekpeyin. 16Ha gna wo ge, “To, lohonya Shekwoyi tu ho anabarka, ha bwa jekpe, ha gyi nyagyi n bugbai gmanyi,” To ha gawo ajekpe kwo nyagyin, mi gye kwo ampanyi?

17Ntucenu fye gye, gaiciyaga to kunlo n kwo gmanyin, Tilas ha zhin bemana ha wu ge ho n gaiciya gailo. Gaiciya ga n kwo to wu kwohin n na tnu-tnu manayin, kwo to zhin gaiciya ga nun, kwo zhin gbeloyi nu, fi-fiyi njesun.

18Ama zaho ɓa naɓo ge “Fye gna, zokwo n kwo lo Shekwoyi aba gaiciya ga nu gmanyi, to ma cige atnu-tnu n na pmailo n mwa, gama n tna atnu-tnu manayi, ho takpe kwo ho n gaiciya gai lo, kwo ho to n cei lon. Ama zaho-zahoi ɓakpe ge mi n gaiciya gai lo ngye shi mi zhin aɓo n wu.”

19Aza lo n fyemi n ɓa ye n cei shilo ge gaiciya ga gmanyi nu kun lo? Gaiciya ga n Shekwoyi gmanyi, To, pa ge aljanu ga gaiciya lo nu ce, n kalayi, har ɓei vin n dnayi. 20Azacije, fye ɓei tumwi n kniwyiyi nu ge, gaiciya ga to n na pmayi lo ntna aɓe zhin n Shekwoyi yen ma? Gaiciya ga n kwo ta wu kwohin n na tnu-tnu manayin kwo to zhin gaiciya ga nun.

21Fye to ye palo ge kwo Ibrahim eyi dada aɓei yiwo oza manayi ntu n wa tnu-tnu manayi ɓo nu n wo ɓei zhin nyin, n wo ɓei ye wa zhin Shekwoyi ɓeye, har wa ga owo nugun Ishaku ɓigba gmanyi, wa fi tu n bagadi n? 22Ho ku gye, wo ɓei kpema Shekwoyi, n mwa har woi cei pma wa zhin oɓo n Shekwoyi wa gna wo ge wo zhin, owo gaiciya ga ɓei nunuyi ntu n wo atnu-tnu manayi ɓo n wo ɓei zhin n Yi 23Ntucenu kwo ɓei zhin shi Shekwoyi ɓeda da n ge Ibrahim ɓei kpema Shekwoyi. Dagayi wa yiwo oza manayi n Shekwoyi abye, har ayiwo nge, “Shekwoyi nugundo.” 24Ntucenu ho ku gye, agni oza ntu n nya bo nu n wa zhin, n nyayi n wo ga gaiciya.

25Rahab Karuwa zhin misali deye nya nu. Aɓei gniwo ntu nyaɓonu n wo ɓei zhinyi, oza n wo ɓei so atnutnuyi fi, wa tnu n ɓai n zokwo do gbo. 26Shi nayi n kwo to n zafun yi n zhin fi-fiyi nu nyi, elonu gaiciya ga n kwo to n na atnu-tnu manayin, zhin fi-fiyi nu.